Home Urdu Section Akhbari Tirashay July, 2009 - جناح فاؤنڈیشن کا شوشہ

پاکستان میں طالبان ، جہادی اور فرقہ پرست تنظیموں کے کالے کرتوتوں کی پردہ پوشی کرنے کے لئے نام نہاد ملاؤں نےتحریروتقریر کے ذریعے احمدیوں کے خلاف مذہبی منافرت کا جو بازار گرم کر رکھا ہے اس میں زردصحافت کےعلمبردار اُردو اخبارات دل و جاں سے دین کی خدمت میں پیش پیش ہیں اور آئے دن احمدیوں کے خلاف کوئی نیا فتنہ کھڑا کرنے میں ہمہ وقت مصروف رہتے ہیں۔  مندرجہ ذیل خبر روزنامہ اُمت کراچی نے اپنے   10جولائی 2009  کے  شمارے  میں  رپورٹر سعید احمد عباسی کے حوالے سے شائع کی۔  (http://www.ummatpublication.com/2009/07/10/story3.html) اگلے روزروزنامہ نوائے وقت نے اسے اپنے رپورٹر آصف سلیم مٹھاکے حوالے سے شائع کیا۔اس کذب و افترا سے بھرپور کہانی میں مبینہ طور پراحمدیوں کو ملک دشمن، چور اور ملکی اثاثے فروخت کرنے والے ظاہر کر کے کم فہم اکثریت کومشتعل کر کے احمدیوں کو نقصان پہنچانے کی مذموم کوشش کی گئی۔ جب جماعت احمدیہ کی طرف سے تردیدی ووضاحتی بیان جاری کیا گیاتومعذرت تو درکنار روزنامہ امت کو یہ توفیق ہی حاصل ہی نہیں ہوئی کہ وہ اسے شائع کرتے حالانکہ کہ وہ اخلاقی طور پر اس بات کے پابند تھے جبکہ پاکستانی سفارت خانے نے بھی اس کہانی کو حقائق کے منافی قرار دیا تھا ۔ روزنامہ نوائے وقت نے اسے محض ایک چھوٹی سی خبر کے طور پر شائع کیا۔ صد افسوس ، پاکستان میں آزادئ صحافت کے علمبردار مادر پدر آزاد تو ہیں ہی لیکن سچ لکھنے سے عاری ان کےقلم ، ظلم، شر اور فساد پھیلانے میں دو دھاری تلوار سے کم نہیں۔ اب چونکہ جماعت احمدیہ کا ایسے کسی ٹرسٹ یافاؤنڈیشن سے یا اس قسم کی کسی تقریب سے کوئی تعلق یا واسطہ نہیں ہے تو ان اخباری رپورٹروں کی اطلاع کے لئے عرض ہے کہ جناح ٹرسٹ اور فاؤنڈیشنز تو پاکستان میں بھی کئی عدد رجسٹرڈ ہیں اور لوگوں نے انہیں ذاتی حیثیت میں رجسٹر کروایا ہوا ہے تو ان پر کونسا قانون لاگو ہوتا ہےیا انہیں کونسی پاکستانی حکومت کی سرپرستی حاصل ہے؟ لیکن شائد اب نام ’جناح‘ بھی حکومت پاکستان کا پیٹنٹ ہو گیا ہے۔ جماعت احمدیہ کو من حیث الجماعت اپنے ویلفئر پروگرامز کے لئے نیلامیوں کی ضرورت لاحق نہیں ہوتی بلکہ خلیفۂ وقت کا ایک حکم ہی کافی ہوتاہے۔بالفرض اگر کوئی شخص انفرادی طور پر کسی قسم کی سرگرمی میں حصہ لے تو پوری جماعت پر اسکی کوئی ذمہ داری عائد نہیں ہوتی۔لیکن جس طرح مغربی میڈیا نے دہشت گردی اور اسلامی بم کو مسلمانوں سے جوڑا ہے اسی طرح پاکستانی میڈیا کا ایک حصہ جماعت احمدیہ کو اسلام دشمن اور خصوصاً پاکستان دشمنی سے منسلک کرنے کی مذموم کوششوں میں مسلسل مصروف ہے۔ ضرورت اس امر کی ہے کہ نام نہاد سرکاری و آئینی مسلمانوں کے ہاتھوں اسلام کے نام پر ہونے والی غیر اسلامی بلکہ غیر انسانی حرکات کی پردہ پوشی کرنے کے بجائے ان کو سامنے لایا جائےاور انکی کاروائیوں سے توجہ ہٹانے کے لئے قربانی کے بکرے تلاش نہ کئے جائیں۔ ایسی غیر اخلاقی صحافت سے پاکستان میں مذہبی منافرت کے لاوا اگلتے آتش فشاں کو ٹھنڈہ کرنے میں کوئی مدد نہیں ملے گی بلکہ یہ  الاؤ مزید بھڑکےگا اور ناحق انسانی جانوں کے زیاں کا سبب بنے گا۔